اسلام آباد (سٹاف رپورٹر) نیشنل ڈیزاسٹر مینجمنٹ اتھارٹی (این ڈی ایم اے) نے آنے والے چند روز کے دوران ملک کے مختلف علاقوں کو متاثر کرنے والے ایک مغربی ہوا کے سلسلے (ویسٹرن ویو) کے پیش نظر ویدر ایڈوائزری جاری کر دی ہے۔ محکمہ موسمیات کے مطابق یہ مغربی ہوا 29 دسمبر 2025 کی شب سے ملک کے مغربی حصوں میں داخل ہو گی اور 30 دسمبر سے شدت اختیار کر لے گی۔ اس کے اثرات 31 دسمبر کو ملک کے بیشتر بالائی اور وسطی علاقوں میں محسوس کیے جائیں گے اور یہ 2 جنوری 2026 کی صبح تک بالائی علاقوں میں برقرار رہنے کا امکان ہے۔
متاثرہ علاقوں میں ناران، کاغان، دیر، سوات، کوہستان، مانسہرہ، ایبٹ آباد، شنگلہ، استور، ہنزہ، سکردو، مری، گلیات، وادی نیلم، باغ، پونچھ اور ہیویلی شامل ہیں جہاں برفباری کے باعث سڑکیں بند ہونے اور پھسلن کے خطرات رہیں گے۔ این ڈی ایم اے نے خبردار کیا ہے کہ خیبرپختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ اور برفانی تودے (ایوالینچ) کا بھی خدشہ ہے۔ سیاحوں اور مقامی عوام کو مشورہ دیا گیا ہے کہ وہ غیر ضروری سفر سے گریز کریں اور حساس اور بلند علاقوں میں اضافی احتیاط کریں۔
این ڈی ایم اے نے متعلقہ صوبائی اور مرکزی ڈیزاسٹر مینجمنٹ حکام کو ہدایت دی ہے کہ وہ تمام ضروری تیاری اور ردعمل کے اقدامات یقینی بنائیں، ایمرجنسی ٹیموں کو الرٹ رکھیں، معلومات بروقت عوام تک پہنچائیں اور ممکنہ خطرات کو کم کرنے کے لیے پیشگی اقدامات کریں۔ اس دوران وسطی و جنوبی پنجاب اور بالائی سندھ میں دھند کے اثرات میں کمی کی توقع ہے۔
این ڈی ایم اے صورتحال پر مسلسل نظر رکھے ہوئے ہے اور متعلقہ حکام کے ساتھ ہم آہنگی کے ذریعے بروقت ردعمل اور حفاظتی اقدامات کر رہا ہے۔ عوام سے درخواست کی گئی ہے کہ وہ “Pak NDMA Disaster Alert” موبائل ایپ کے ذریعے تازہ ترین موسمی اطلاعات اور ویدر ایڈوائزریز حاصل کریں، خاص طور پر متاثرہ علاقوں کے سفر کی منصوبہ بندی سے قبل.
