اسلام آباد (سٹاف رپورٹر )حکومتِ پنجاب نے کمپنیز ایکٹ2017 کی دفعات کے مطابق سکیورٹیز اینڈ ایکسچینج کمیشن آف پاکستان (ایس ای سی پی) یا کسی بھی عدالت کے حکم سے منظور شدہ انضمام (مرجرز) اور سکیم آف ارینجمنٹ کے نتیجے میں پراپرٹی کے انتقال پر عائد سٹامپ ڈیوٹی کو ختم کرنے کا نوٹیفکیشن جاری کر دیا ہے۔سکیم آف ارینجمنٹ کے نتیجے میں پراپرٹی کے انتقال پر عائد سٹامپ ڈیوٹی کو ختم کرنے کا نوٹیفکیشن لاہور ہائی کورٹ (راولپنڈی بنچ) کے فیصلے کے نتیجے میں جاری کیا گیا ہے۔
ایس ای سی پی کی جانب سے ہفتہ کو جاری اعلامیہ کے مطابق لاہور ہائی کورٹ کے جسٹس جواد حسن اور جسٹس ملک جاوید اقبال وائیں پر مشتمل بینج نے ایک کارپوریٹ کیس میں یہ جائزہ لیا کہ آیا حکومتِ پنجاب عدالت یا ایس ای سی پی سے منظور شدہ مرجر سکیموں پر سٹامپ ڈیوٹی عائد کر سکتی ہے یا نہیں۔کیس کی سماعت کے دوران ایس ای سی پی نے عدالت کو آگاہ کیا کہ کمپنیز ایکٹ کے تحت اسلام آباد میں رجسٹرڈ دفاتر رکھنے والی کمپنیوں کو عدالت یا ایس ای سی پی سے منظور شدہ مرجرز یا سکیم آف ارینجمنٹ کے نتیجے میں جائیداد کی منتقلی پر سٹامپ ڈیوٹی سے استثنا حاصل ہے۔
تاہم صوبوں میں اس شق کا اطلاق متعلقہ صوبائی حکومتوں کی جانب سے نوٹیفکیشن یا قانون سازی کے بعد ہی ممکن ہوتا ہے۔ عدالت نے چیف سیکرٹری پنجاب اور ایس ای سی پی کو اس معاملے پر مشاورت کی ہدایت کی۔ اس حوالے سے متعدد اجلاسوں میں غور و خوض کے بعد حکومتِ پنجاب نے عدالت یا ایس ای سی پی سے منظور شدہ مرجرز یا سکیم آف ارینجمنٹ کے نتیجے میں ہونے والی جائیداد کی منتقلی پر سٹامپ ڈیوٹی سے استثنا کا نوٹیفکیشن جاری کر دیا ہے۔واضح رہے کہ کمپنی قانون وفاقی دائرہ اختیار میں آتا ہے جبکہ سٹامپ ڈیوٹی صوبائی اختیار ہے۔
قانون کے اس فرق کی وجہ سے پنجاب میں تنظیمِ نو (ری سٹرکچرنگ) اور مرجرز کرنے والی کمپنیوں کو مشکلات کا سامنا تھا۔ اس استثنا سے کمپنیوں کی ری سٹرکچرنگ کے معاملات آسان ہوں گے، اخراجات میں کمی ہو گی اور صوبے میں کارپوریٹ تنظیمِ نو، سرمایہ کاری اور کاروباری ترقی کو فروغ ملے گا۔ایس ای سی پی نے حکومتِ پنجاب کے فیصلے کا خیرمقدم کرتے ہوئے اسے کارپوریٹ شعبے کے لیے ایک مثبت اقدام قرار دیا ہے۔ کمیشن اس حوالہ سے بروقت رہنمائی فراہم کرنے پر عدالت کا بھی مشکور ہے۔
