اسلام آباد(سٹاف رپورٹر)قومی ادارہ برائے ہنگامی حالات (NDMA) 21 تا 22 جنوری 2026 کو اسلام آباد میں NDMA ہیڈکوارٹرز میں ڈیزاسٹر رسک ریڈکشن (DRR) پر اقتصادی تعاون تنظیم (ECO) کے دسویں وزارتی اجلاس کی میزبانی کرنے جا رہا ہے یہ پہلا موقع ہے کہ پاکستان ڈیزاسٹر رسک ریڈکشن پر ECO وزارتی اجلاس کی میزبانی کر رہا ہے، جو ملک کی علاقائی سطح پر بڑھتی ہوئی قیادت اور تعاون میں کردار کی عکاسی کرتا ہے۔ اس اعلیٰ سطح کے اجلاس میں ECO کے رکن ممالک کے وزراء اور سینئر عہدیدار، ECO سیکرٹریٹ کے نمائندے، اور علاقائی و بین الاقوامی شراکت دار ادارے شرکت کریں گے۔
اجلاس کا مقصد علاقائی تعاون کو مضبوط بنانا، جدید ٹیکنالوجی اور جدت کے ذریعے علاقائی لچک میں اضافہ، ہم آہنگی کے میکانزم کو بہتر بنانا، ڈیزاسٹر رسک ریڈکشن کے فریم ورک کو ہم آہنگ کرنا، اور بین الاقوامی اور موسمی خطرات کے خلاف اجتماعی تیاری کو فروغ دینا ہے۔ اس موقع پر تکنیکی حل، ڈیٹا شیئرنگ، ابتدائی وارننگ سسٹمز، اور جدید عملی اقدامات پر بھی زور دیا جائے گا تاکہ علاقائی خطرات سے نمٹا جا سکے ECO کے رکن ممالک، بشمول پاکستان، ترکی، آذربائیجان، قازقستان، کرغزستان، تاجکستان، ترکمانستان، ایران، ازبکستان اور افغانستان، دو روزہ اجلاس میں حصہ لیں گے۔ اجلاس کی کارروائی ڈیزاسٹر رسک ریڈکشن پر اعلیٰ سطحی ورکنگ گروپ میٹنگ سے شروع ہوگی، جس کے بعد 22 جنوری 2026 کو وزارتی اجلاس منعقد ہوگا، جس میں اہم علاقائی اقدامات اور مسودہ اسلام آباد اعلامیہ کی منظوری پر غور کیا جائے گا۔
ECO کے دسویں وزارتی اجلاس کی میزبانی پاکستان کی علاقائی یکجہتی کے عزم اور شامل، مربوط، اور مستقبل بین نقطہ نظر کے تحت ڈیزاسٹر رسک ریڈکشن میں پیش قدمی کی وابستگی کو ظاہر کرتی ہے، جبکہ جدت اور ٹیکنالوجی کو پائیدار لچک کے لیے اہم کردار کے طور پر فروغ دیا جا رہا ہے۔
