اسلام آباد(سٹاف رپورٹر )نیوٹیک نے 21ویں مائی کراچی ایکسپو 2026 میں فعال طور پر شرکت کی، ایکسپو کا افتتاح وزیر اعلیٰ سندھ سید مراد علی شاہ نے وزیر صنعت سندھ جام اکرام اللہ دھاریجو کے ہمراہ کیا۔ چیئرمین بزنس مین گروپ زبیر موتی والا، تاجر برادری کے سرکردہ اراکین، تجارتی و ٹاؤن ایسوسی ایشنز کے نمائندوں اور غیر ملکی سفارتی مشنز کی موجودگی میں کیا گیا۔
ایکسپو کے دوران، گورنر سندھ جناب کامران ٹیسوری اور وزیر اعلیٰ سندھ سید مراد علی شاہ نے چیئرمین بی ایم جی اور ممتاز کاروباری رہنماؤں کے ہمراہ نیوٹیک پویلین کا دورہ کیا۔ معززین نے نیوٹیک ٹیم کے ساتھ بات چیت کی اور یونیورسٹی کے اختراعی اقدامات اور تعلیمی علم کو صنعت کی ضروریات کے ساتھ ہم آہنگ کرنے میں اس کے اہم کردار کو سراہا۔ چئیرمین بزنس مین گروپ زبیر موتی والا نے نیوٹیک کی مسلسل شرکت اور صنعت پر مبنی تحقیق اور ترقیاتی منصوبوں کی نمائش کو سراہا۔
نیوٹیک نے آباد کے تعاون سے صنعتی تحقیقی منصوبوں، اے آئی پر مبنی اور نیوٹیک ریسرچ سینٹر کے اقدامات، اور کوآپریٹو بی ای ٹی سول انجینئرنگ پروگرام کی ایک وسیع رینج کی نمائش کی، جس نے صنعتوں، ملٹی نیشنل کمپنیوں اور عام لوگوں کی جانب سے نمایاں دلچسپی حاصل کی۔ اس شرکت کے ذریعے، نیوٹیک نے قومی اور عالمی ترقی کے لیے تکنیکی طور پر ہنر مند پیشہ ور افراد کو تیار کرنے کے اپنے وژن سے ہم آہنگ، تحقیق کی عمدگی، اختراع، اور سماجی اثرات کے لیے اپنی لگن کی تصدیق کی.
