اسلام آباد (کیپیٹل نیوز پوائنٹ) وفاقی وزیر اور مسلم لیگ (ن) کے سینئر رہنما انجینئر امیر مقام نے خیبرپختونخوا میں پاکستان تحریک انصاف کی طویل حکمرانی پر تنقید کرتے ہوئے کہا ہے کہ صوبے کے بنیادی مسائل تاحال حل نہیں ہوسکے۔
اسلام آباد میں پریس کانفرنس کرتے ہوئے امیر مقام نے کہا کہ خیبرپختونخوا میں پی ٹی آئی کو تقریباً 13 سال سے اقتدار حاصل ہے، تاہم ان کے مطابق صوبائی حکومت اور وزیراعلیٰ کی جانب سے عوام کو درپیش بنیادی مسائل پر مطلوبہ توجہ نظر نہیں آتی۔
خیبرپختونخوا میں امن و امان کی صورتحال پر تشویش :
امیر مقام نے صوبے میں امن و امان کی صورتحال پر تشویش کا اظہار کرتے ہوئے کہا کہ خیبرپختونخوا میں دہشتگردی سمیت مختلف ناخوشگوار واقعات مسلسل پیش آ رہے ہیں، جس سے شہریوں کو مشکلات کا سامنا ہے۔
ان کا کہنا تھا کہ پی ٹی آئی نے اقتدار میں آنے سے قبل عوام سے متعدد وعدے کیے تھے، تاہم اب اس کی 13 سالہ کارکردگی کے حوالے سے سوالات اٹھ رہے ہیں ، انہوں نے سوال کیا کہ پی ٹی آئی کے طویل دور حکومت میں خیبرپختونخوا کے عوام کو عملی طور پر کیا ریلیف فراہم کیا گیا۔
گورننس بنیادی مسئلہ ہے، امیر مقام :
وفاقی وزیر نے کہا کہ صوبائی حکومت کے پاس اپنی کارکردگی کے طور پر پیش کرنے کے لیے کوئی نمایاں کامیابی موجود نہیں، جبکہ ان کے مطابق خیبرپختونخوا میں گورننس کا مسئلہ بنیادی اہمیت اختیار کرچکا ہے ، امیر مقام کا کہنا تھا کہ صوبائی قیادت کو سیاسی بیانات، نعروں اور سوشل میڈیا سرگرمیوں کے بجائے عوامی مسائل کے حل پر توجہ دینی چاہیے۔
امن، ترقی اور عوامی مسائل پر عملی اقدامات کا مطالبہ :
امیر مقام نے کہا کہ خیبرپختونخوا کے عوام کو امن و امان، روزگار، ترقی اور بہتر حکمرانی کی ضرورت ہے، جس کے لیے عملی اقدامات کیے جانے چاہئیں ، انہوں نے کہا کہ صوبے میں موجود مسائل کے حل کے لیے سیاسی سرگرمیوں کے ساتھ ساتھ حکومتی ذمہ داریوں پر بھی توجہ دینا ضروری ہے۔
