سوشل میڈیا انفلوئنسر اور اداکارہ دعا زہرہ نے انکشاف کیا ہے کہ انہیں کرکٹ سے گہرا لگاؤ ہے اور ان کا دل ایک ہی کھلاڑی کے لیے دھڑکتا ہے—بابر اعظم!
ڈرامہ سیریل دوریاں اور بےرنگ میں اپنی اداکاری کے جوہر دکھانے والی دعا زہرہ حال ہی میں دی نائٹ شو ود ایاز سموں میں جلوہ گر ہوئیں، جہاں انہوں نے شادی، کرکٹ اور اپنی پسندیدگیوں کے حوالے سے کھل کر گفتگو کی۔
انہوں نے واضح کیا کہ وہ فی الحال سنگل ہیں اور اس میں خوش بھی ہیں، کیونکہ وہ “ڈائریکٹ نکاح” پر یقین رکھتی ہیں۔ اپنے ممکنہ شریکِ حیات کے حوالے سے دعا زہرہ کا کہنا تھا کہ وہ ایسا شخص چاہتی ہیں جو ایماندار ہو، جھوٹ نہ بولے اور کچھ نہ چھپائے۔
مالی حیثیت کے بارے میں ان کا دلچسپ تبصرہ تھا: “اگر وہ ایک جوڑے میں لے جائے گا تو میں کما لوں گی”۔ ان کے مطابق دولت سے زیادہ اخلاص اور ہم آہنگی اہم ہے۔
سوشل میڈیا اور اداکاری کے فرق پر بات کرتے ہوئے دعا زہرہ نے کہا کہ “سوشل میڈیا انفلوئنسر بننے کے لیے سب کچھ خود کرنا پڑتا ہے، لائٹس سیٹ کرنی ہوتی ہیں، لیکن ڈراموں میں سب کچھ پہلے سے موجود ہوتا ہے، بس ڈائیلاگ بولنے ہوتے ہیں”۔
آخر میں، انہوں نے اپنی سب سے بڑی خواہش کا اظہار کرتے ہوئے کہا: “میری دعا ہے کہ میں اپنی والدہ کی تمام خواہشات پوری کر سکوں”۔
