اسلام آباد(کرائم رپورٹر )ڈی آئی جی اسلام آبادمحمد جواد طارق کی ڈولفن اور ابابیل سکواڈ کے افسران و جوانوں کو بریفنگ ،تمام افسران وفاقی دارلحکومت میں محرم الحرام کے دوران فول پروف سیکورٹی اور امن و امان کی فضاءکے قیام میں اپنا کردار ادا کریں،انہوں نے محرم الحرام کے پیش نظر حساس مقامات پر پٹرولنگ کو مزید موثر بنانے کے احکامات جاری کئے۔
تفصیلات کے مطابق ڈپٹی انسپکٹر جنرل آف پولیس اسلام آبادمحمد جواد طارق نے ڈولفن اور ابابیل سکواڈ میں تعینات افسران و جوانوں کو بریفنگ دی،انہوں نے کہا کہ تمام افسران و جوان محرم الحرام کے دوران فول پروف سیکورٹی اور امن و امان کی فضاءکے قیام میں اپنا بھرپور کردار ادا کریں، محرم الحرام میں مجالس اور جلو سوں کو بھر پور تحفظ فراہم کرنے کے لئے ٹھوس اقدامات کریں،انہوں نے تمام افسران و جوانوں کو محرم الحرام کے پیش نظر حساس مقامات پر پٹرولنگ کو مزید موثر بنانے کے احکامات بھی جاری کئے .
ڈی آئی جی اسلام آباد نے مزید کہا کہ تمام افسران و جوان اپنی ڈیوٹی مکمل ایمانداری،دیانتداری اور عبادت سمجھ کر ادا کریں ،وفاقی دارلحکومت میں جرائم کی بیخ کنی کے لئے گشت کو مو ثر بنائیں،”پکار “15-کی کالز پر فوری ریسپانس کو یقینی بنائیں،ہم نے شہریوں کو تحفظ کا احساس دلانا ہے اور شہریوں کے ساتھ حسن اخلاق سے پیش آنا ہی ہمارا اولین مقصد ہے.
