اسلام آباد (سپورٹس رپورٹر ) قومی کرکٹ ٹیم نے ویسٹ انڈیز کے خلاف پہلے ٹی 20 انٹرنیشنل میچ میں 14 رنز سے کامیابی حاصل کرتے ہوئے تین میچوں کی سیریز کا فاتحانہ آغاز کیا ہے۔ امریکی ریاست فلوریڈا کے شہر لاڈرہل میں کھیلے گئے میچ میں ویسٹ انڈین کپتان شائے ہوپ نے ٹاس جیت کر پاکستان کو پہلے بیٹنگ کی دعوت دی۔
پاکستان نے مقررہ 20 اوورز میں 6 وکٹوں کے نقصان پر 178 رنز اسکور کیے۔ نوجوان بلے باز صائم ایوب نے 57 رنز کی ناقابل شکست اننگز کھیلی اور بعد ازاں 2 وکٹیں بھی حاصل کر کے میچ کے بہترین کھلاڑی قرار پائے۔ ان کے علاوہ فخر زمان نے 28، حسن نواز نے 24، فہیم اشرف نے 16، اور صاحبزادہ فرحان نے 14 رنز بنائے۔ سلمان علی آغا اور محمد حارث بالترتیب 11 اور 6 رنز کے ساتھ ناٹ آؤٹ رہے۔ ویسٹ انڈیز کی جانب سے شیمار جوزف نے 3 کھلاڑیوں کو آؤٹ کیا۔
جواب میں ویسٹ انڈیز کی ٹیم ہدف کے تعاقب میں 7 وکٹوں پر 164 رنز ہی بنا سکی۔ جانسن چارلس اور جیول اینڈریو نے 35، 35 رنز کی اننگز کھیلیں جبکہ جیسن ہولڈر نے 30 اور شیمار جوزف نے 21 رنز بنائے۔ دیگر بلے باز خاطر خواہ کارکردگی نہ دکھا سکے۔ پاکستان کی جانب سے محمد نواز نے 3، صائم ایوب نے 2، جبکہ شاہین شاہ آفریدی اور سفیان مقیم نے ایک ایک وکٹ حاصل کی۔
اس کامیابی کے بعد پاکستان نے سیریز میں 1-0 کی برتری حاصل کر لی ہے، اور اگلے میچ میں فتح کی صورت میں سیریز اپنے نام کرنے کا موقع حاصل ہوگا۔ نوجوان کھلاڑیوں کی عمدہ کارکردگی اور ٹیم کی مجموعی کارکردگی نے شائقین کو خوشگوار حیرت میں ڈال دیا ہے۔
