اسلام آباد ۔آرمی چیف جنرل عاصم منیر نے کہا ہے کہ مجھے کسی کا کوئی خط موصول نہیں ہوا، اور اگر ملا بھی تو میں اسے پڑھنے کے بجائے وزیراعظم کے حوالے کر دوں گا۔
اسلام آباد میں صحافیوں سے غیر رسمی بات چیت کے دوران سپہ سالار نے کہا کہ ملک اچھے انداز میں ترقی کر رہا ہے۔
انہوں نے کہا کہ پاکستان کو آگے بڑھنا ہے، اور ملک میں ترقی جاری ہے۔
آرمی چیف نے کہا کہ خط سے متعلق باتیں محض چالاکیاں ہیں، مجھے کوئی خط نہیں ملا، اور اگر ملا بھی تو میں اسے نہیں پڑھوں گا بلکہ وزیراعظم کو بھیج دوں گا۔
یاد رہے کہ سیکیورٹی ذرائع پہلے ہی واضح کر چکے ہیں کہ انہیں کوئی خط موصول نہیں ہوا اور نہ ہی وہ کسی ایسے خط کو پڑھنے میں دلچسپی رکھتے ہیں۔
ذرائع کے مطابق آرمی چیف کی گفتگو سے یہ بات واضح ہو گئی ہے کہ حکومت اور فوج ایک ہی موقف پر ہیں، اور آرمی چیف نے اپنے بیان کے ذریعے حکومت پر اعتماد کا اظہار کیا ہے۔
